ચામાચિડીયા ઘર

આમ તો ઈમારત ઊભી છે

તેના પાયાનો પથ્થર હું છું

મેં જ તેને પરિશ્રમપૂર્વક ઘડી છે.

સાચું. કહું?

આ ઈમારતમાં 

મેં સર્વની મંગલકામના વાંછી હતી .

પણ,

વર્ણ-વર્ગના ચામાચિડીયા

ધર્મના નામે-

અર્થના નામે-

કામના નામે-

મોક્ષના  નામે-

વાસ કરી 

ધીમે ધીમે..અધિપતિ બની 

મારા નાક ,કાન,આંખ ને અંગૂઠો

અરે,ધડ પણ..!

આજે તો મારી સમગ્ર હયાતી 

ગ્રસી રહ્યા છે.

તેથી જ સ્તો- 

આ ચામાચિડીયા ઘરના

દુર્ગંધ મારતા ખંડિયેરને

હાક થૂ  કરી 

હું ચાલતો થયો છું ને?