ગલિયાને...

ખરું થયું છે –

આ ગલિયાને!

બે ગાય, ચાર ભેંસ,

છ બળદની ગમાણ

દિ’ ઉગે – આથમે

છાણ ભરી ભરી ટોપલે 

જિંદગી ઉકરડે ઠલવાય !

ગલિયાને ખરું થયું છે, ભાઈ !

ખેતરમાં એક દિ’ દા’ડીએ ...

છાશના ઢોચકે

અડક્યાનું પાતક...!

ગલીયાને

રૂપિયા વીસનો દંડ

મજૂરી ગઈ ભાડમાં

માર મફતમાં

ગાળનો હિસાબ નહીં.

પછી ,

વીસ ના વરસે વીસ...વીસ...

ખંડણીમાં –

ખેતરથી ભારો

ને

છાણ  આખો દિ’.

જીવતર વૈતરું છે, ભાઈ !

મનુથી

આજ સુધી...

ના ધર્મ, ના કર્મ, ના કરુણા...

અરે ક્રાન્તિય  ના,

ના કાયદો, ના કારોબાર

કોઈ બચાવી શક્યું નથી, ભાઈ !

પૂછું, “લ્યા ગલિયા !

કયા જન્મારાનું

કોનું પાપ-દેણું

ચૂકવીએ છીએ આપણે, આજે?

બોલ તો ખરો ‘લ્યા ...

તને શું થયું છે , ભાઈ?

ગલિયાને ખરું થયું છે, ભાઈ !