લાચાર આદમી

ધાકથી  લાચાર આદમી

બેવડ વળી

પાયખાનું સાફ કરે છે.

માખીઓ કાનમાં ગણગણે  છે :

‘આ ઝાડું-

ઝાડા કરનાર માટે અનામત છે, દોસ્ત!’

ક્ષુદ્રો માટે સેવા,

દ્વિજો માટે મેવા.

શ્રુતિ-સ્મૃતિનાં નામે ,

ધર્મ નિયતિના નામે

આ હળાહળ જૂઠાણાં માટેતારી માફી માગવા

હવે ક્યારેય ...

અવતરશે નહિ ભગવાન !

પરંતુ ,

અભાવગ્રસ્ત, વેદનાગ્રસ્ત

આ ભૂખ્યો આદમી

હાથમાંનું ઝાડું હેઠું મૂકી

ઊંડી આહ સાથે

બગાસું ખાય છે,

દિવાસળી સળગાવે છે

બીડી પીએ છે.

ને પછી , આંખો પર હાથનું નેજવું કરી

ઘડીભર ધૂમ્રસેરોમાં

કર્ણ નજરે,

કુરુક્ષેત્રને જુવે છે !